Waxaa abaarro ba’ani ka dhacay qaybo ka mid ah gobollada Somaliya, qaarkoodna ay gaareen xaalad aad u xun, abaarahaasi waxay ka dhaceen degaamada Gedo, Bay, Bakool, Jubbooyinka, iyo qaar ka mid ah degmooyinka Jubbada hoose.

Sababihii keenay abaaraha oo ahayd roob la’aan ka dhacday degaamadaas iyo wabigii oo guray. Abaarahan oo saameeyay dadkii iyo duunyadii.

Ururka HIRDA oo fadhigiisu yahay degmada Bardere, Gobolka Gedo wuxuu ku dadaalay sidii uu uga shaqayn lahaa isku xirka dadka dega degaankaas oo ku nool waddamada galbeedka, sidoo kale ururku wuxuu ka qayb qaatay dhisidda guddiga abaaraha ee waddanka Holland, guddigaas oo yeeshay fadhiyo kala duwan kii ugu horreeyayna uu ahaa 8 January, kii labaadna ahaa 4tii Feb, kii 3aadna ahaa 19 Feb, kulamadaas waxaa lagu soo aruuriyay lacag gaaraysa 4.562 dollar, lacagtaas oo loo diray guddiyadii abaaraha ee ka dhisnaa Gedo.

Guddiga abaaraha ee Holland wuxuu wali ku mashquulsan yahay soo aruurintii lacagaha fadhigiisa soo socda oo ah 26 Feb, ayada oo laga hadli doono wajiga labaad ee gurmadka abaaraha, fadhi ballaarana loo qaban doono dadka ku nool Waddanka Holland.

Xilligii roobka la sugayay oo ku beeggan bisha April haddii roob yimaado dalaggii la beero wuxuu soo bixi karaa ugu yaraan bisha July intaasna dadku waxay u baahan doonaan wax ay ku sii gaaraan.

Dhinaca kalana waxaa laga baqayaa in dhibaatooyinka abaaraha ay gaystaan sida baaba’a xoolaha inay keeni karto cudurro xun xun oo ka dilaaca soonaha, taas oo saamayn wayn ku yeelan doonto nolosha dadka ku nool degaanka.

Ururka HIRDA wuxuu u mahadcelinayaa dadkii Somaliyeed ee ka gaystay kaalmada gacan, wuxuuna ugu baaqayaa dadka Somaliyeed inay u istaagaan sidii ay ugu gurmad lahaayeen walaalahooda abaaruhu saameeyay, ayna isku tashadaan oo aysan u fadhin kaalmada shisheeye taasoo waqti badan qaadata sidii ay ku soo gaari lahayd goobihii abaaruhu ka dhaceen.

xoolihii oo macaluul u baaba’ay dhirtii oo qalashay

xoolihii ku nafwaayay abaartii ka dhacday degaanka Gedo

Qofkii ku deeqaya kaalmo barnaamijka abaaraha wuxuu kala soo xiriiri karaa ururka HIRDA oo saldhigiisu yahay Holland, meelkasta oo qofku joogana wuxuu ku tabaruci karaa kaalmo asaga oo ku soo shubaya account ururka kuna muujinaya inuu u bixiyay abaaraha.